Омбудсмендерге сот актілеріне кассациялық өтінішхат енгізу құқығын беру қажеттілігі туралы мәлімдеме жасалды, деп жазды Kapital.kz.

Қазақстанда бизнес-омбудсмен мен адам құқықтары жөніндегі омбудсменнің өкілеттіктерін күшейту ұсынылды. Бұл туралы Қазақстан кәсіпкерлерінің құқықтарын қорғау жөніндегі уәкіл Рустам Жүрсінов өзінің Facebook-тегі парақшасында жазды.

«Бүгін Қазақстан Республикасындағы Адам құқықтары жөніндегі уәкіл Артур Ластаевпен кездестім. Қазақстандағы бизнес-омбудсмен мен адам құқықтары жөніндегі омбудсменнің жұмысы ұқсас. Себебі біз кәсіпкерлердің құқықтары бұзылған жағдайда бірлесіп жұмыс істейміз. Мұндай жағдайларда мен кәсіпкерлердің құқықтарын қорғау және азаматтар мен мемлекеттік органдар арасындағы қақтығыстарды шешуге көмектесу үшін адам құқықтары жөніндегі омбудсменмен ынтымақтаса аламын. Сондай-ақ, екі жағдайда да заңнаманы сақтау және азаматтардың құқықтарын, соның ішінде адал және әділ бизнестің құқықтарын қорғау маңызды", - деп атап өтті Рустам Жүрсінов.

Мысалы, кәсіпкерлердің өтініштерін қарау кезінде кәсіпкерлердің құқықтарын қорғау жөніндегі уәкіл кассациялық тәртіппен заңды күшіне енген сот үкімдеріне шағымдануды талап ететін жағдайлар туындайды. Алайда, бизнес-омбудсменнің мұндай құқығы қолданыстағы заңнамада көзделмеген.

«Бұл жерде өтініштердің көпшілігі кассациялық сатыға қарауға берілмейтініне назар аударғым келеді. Шын мәнінде, бұл Жоғарғы Сотқа түсетін жүктемені төмендету механизмі болып табылады. 2019 жылы азаматтық істер бойынша 17 өтініштің 1-і кассацияға берілді, 2018 жылы – 1-ден 1-і, қылмыстық істер бойынша - 27-ден 1-і, 2018 жылы - 37-ден 1-і. Бұл жағдай өз құқықтарын сотта қорғау үшін конституциялық құқықтың шектелгенін куәландырады», - деген пікірде бизнес-омбудсмен.

Ол негізсіз сот шешімдерінен зардап шеккен кәсіпкерлер наразылық білдірген халықты қалыптастыратынын атап көрсетеді.

«Халықтың, оның ішінде кәсіпкерлер арасындағы әлеуметтік шиеленісті төмендету мақсатында бизнес-омбудсменге және адам құқықтары жөніндегі омбудсменге заңды күшіне енген сот актілеріне кассациялық өтінішхат енгізу құқығын беру ұсынылады.

Кассациялық өтініш омбудсменнің өз бастамасы бойынша не сот талқылауына қатысушының өтініші негізінде немесе оның іс жүргізу өкілінің мүддесі үшін ұсынылуы мүмкін», - деп жазды Рустап Жүрсінов.

Спикер бастама қолдау тапқан жағдайда қолданыстағы заңнамаға өзгеріс енгізу қажет болатынын атап өтті. Бұл ұсыныс Мемлекет басшысына енгізілді.